गोंदिया जिल्ह्यातील वाहन ताब्यात : लाखोंचा सुगंधित तंबाखू जप्त

चंद्रपूर :- अवैध धंद्यांविरोधात तसेच प्रतिबंधित सुगंधित तंबाखूच्या वाहतुकीवर आळा घालण्यासाठी मूल पोलिसांनी धडक कारवाई केली. गुप्त बातमीदाराकडून मिळालेल्या पक्क्या माहितीच्या आधारे पोलिसांच्या पथकाने उमा नदीच्या पुलाजवळ सापळा रचून प्रतिबंधित सुगंधित तंबाखू व तंबाखूजन्य पदार्थाची वाहतूक करणारे वाहन पकडले. या कारवाईत एकूण ६ लाख ९९ हजार ७५० रुपये किमतीचा मुद्देमाल जप्त करण्यात आला आहे. Police lay trap on Uma River bridge

पोलिसांनी केलेल्या कारवाईत प्रतिबंधित सुगंधित तंबाखू, खुला तंबाखू तसेच महिंद्रा कंपनीची बोलेरो पिकअप जप्त करण्यात आली. या कारवाईमुळे प्रतिबंधित तंबाखूची अवैध वाहतूक करणाऱ्यांमध्ये खळबळ उडाली आहे.

पोलिसांनी जप्त केलेल्या मुद्देमालामध्ये होल्ड धक्का हिरा तंबाखूचे ३ प्लास्टिक चुंगळे व ३० प्लास्टिक बांधे, एकूण ३० किलो असा तंबाखू असून त्याची अंदाजे किंमत ३९ हजार ७५० रुपये आहे. तसेच पोपटी रंगाच्या २० प्लास्टिक चुंगळ्यांमध्ये असलेला खुला तंबाखू सुमारे १ लाख ६० हजार रुपये किमतीचा आहे.
याशिवाय महिंद्रा कंपनीची बोलेरो पिकअप (वाहन क्रमांक MH 35 AJ 3595) अंदाजे ५ लाख रुपये किमतीची जप्त करण्यात आली आहे. अशा प्रकारे पोलिसांनी एकूण ६ लाख ९९ हजार ७५० रुपयांचा मुद्देमाल जप्त केला.

या प्रकरणात पोलिसांनी राहुल हिरालाल मल्लेवार (वय २६ वर्षे, रा. गोरेगाव, जि. गोंदिया) याला ताब्यात घेतले आहे. तो सदर बोलेरो पिकअप वाहन चालवत असल्याची माहिती पोलिसांनी दिली आहे.
पंचनामा करून पुढील कायदेशीर कारवाई
कारवाईदरम्यान पंचांसमक्ष घटनास्थळाचा पंचनामा करून ई-साक्ष अॅपद्वारे छायाचित्रण व व्हिडिओग्राफी करण्यात आली. जप्त करण्यात आलेला प्रतिबंधित सुगंधित तंबाखू तसेच वाहन मूल पोलीस ठाण्याच्या सुरक्षित ताब्यात ठेवण्यात आले आहे.

प्रकरणातील पुढील कायदेशीर व अन्नविषयक कारवाईसाठी अन्न व औषध प्रशासन विभाग (FDA), चंद्रपूर यांना माहिती देण्यात आली आहे. त्यामुळे संबंधितांवर अन्न व औषध प्रशासनाच्या कायद्यानुसारही पुढील कारवाई होण्याची शक्यता आहे.

सदर कारवाई पोलिस अधीक्षक आयुष नोपाणी, अपर पोलिस अधीक्षक ईश्वर कातकाडे, उपविभागीय पोलिस अधिकारी सत्यजित आमले यांच्या मार्गदर्शनाखाली मूल पोलीस ठाण्याचे पोलिस निरीक्षक विजय राठोड यांच्या नेतृत्वात पोलीस उपनिरीक्षक रुपेश कुभरे, पोलीस हवालदार पंकज कडाडे आणि पोलीस हवालदार भास्कर कोवे यांनी केली.