Right to Service Day Program
चंद्रपूर :- कल्याणकारी राज्यामध्ये नागरिकांना शासनाच्या विविध सेवा उपलब्ध करून देण्याला प्राधान्य देण्यात आले आहे. तसेच सदर सेवा विहित वेळेत मिळणे, हा नागरिकांचा हक्क आहे. त्यामुळे सर्व विभागांनी आपापल्या विभागाच्या अधिसुचित सेवा नागरिकांपर्यंत पोहचवाव्यात, असे प्रतिपादन जिल्हाधिकारी विनय गौडा जी.सी. यांनी केले. Bring the notified services of the department to the citizens – Collector Vinay Gowda
जिल्हा प्रशासन व चंद्रपूर महानगर पालिकेच्या वतीने नियेाजन सभागृह येथे आयोजित सेवा हक्क दिन कार्यक्रमात ते बोलत होते. यावेळी अतिरिक्त जिल्हाधिकारी नितीन व्यवहारे, मनपा आयुक्त विपीन पालिवाल, निवासी उपजिल्हाधिकारी दगडू कुंभार, उपायुक्त मंगेश खवले आदी उपस्थित होते.
शासन आणि प्रशासन लोकांसाठी काम करते, असे सांगून जिल्हाधिकारी श्री. गौडा म्हणाले, सेवा हक्क अधिनियम लागू होऊन आज दहा वर्षे पूर्ण झाली. नागरिकांना कल्याणकारी सेवा उपलब्ध करून देणे, हे शासन – प्रशासनाचे कर्तव्य आहे. या सेवा त्यांना वेळेत मिळण्यासाठी आपापल्या विभागाच्या अधिसुचित सेवा नागरिकांपर्यंत पोहचवा. लोकांना त्रास न होता सेवा मिळाल्या तर शासन-प्रशासनाची प्रतिमा उंचाविण्यास मदत होईल, असे त्यांनी सांगितले. यावेळी जिल्हाधिका-यांनी उपस्थितांना सेवा हक्क दिनाची शपथ दिली.
यावेळी आयुक्त विपीन पालिवाल म्हणाले, सेवा हक्क अधिनियम सकारात्मक स्वरुपाचा कायदा आहे. सेवा किती दिवसात दिल्या पाहिजे, याचे बंधन या कायद्यात आहे. सर्व सेवा ऑनलाईन देण्याचे नियोजन आहे. चंद्रपूर महानगर पालिकेतर्फे नागरिकांसाठी 70 सेवा अधिसुचित केल्या असून या सेवा चांगल्या पध्दतीने देण्याचा पालिकेचा मानस आहे. Right to Service Day Program
प्रास्ताविकात निवासी उपजिल्हाधिकारी कुंभार म्हणाले, प्रत्येक विभागाच्या अधिसुचित सेवा पारदर्शक पध्दतीने विहित कालावधीत मिळाव्या, हा या आयोजनामागचा उद्देश आहे. सर्व सेवांची माहिती जास्तीत जास्त लोकांना मिळणे आवश्यक आहे. वेळेत सेवा नाही दिली तर संबंधितांना 500 ते 5 हजार रुपयांपर्यंत दंड होऊ शकतो, असे त्यांनी सांगितले.
कार्यक्रमाचे संचालन जिल्हा प्रकल्प प्रमुख विकास लालसरे यांनी तर आभार उपायुक्त मंगेश खवले यांनी मानले. तत्पुर्वी मान्यवरांच्या हस्ते चंद्रपूर शहर महानगरपालिकेच्या सेवांचे डीजीटल पध्दतीने लोकार्पण, महापालिकेच्या सेवा हक्क कायदा वेबसाईटचे उद्घाटन तसेच सिटीजन चार्टर क्यूआर कोडचे उद्घाटन करण्यात आले.
