चंद्रपूर :- वाढत्या महागाईच्या काळात वीज ग्राहकांना आर्थिक दिलासा देण्यासाठी महावितरणने Msedcl सुरू केलेली ‘स्मार्ट टीओडी’ (Time Of Day) मीटर योजना लाभदायी ठरत आहे. चंद्रपूर आणि गडचिरोली जिल्ह्यांतील वीज ग्राहकांनी सप्टेंबर महिन्यात या योजनेच्या माध्यमातून तब्बल ४८ लाख ६५ हजार रुपयांची बचत केली आहे. दिवसा वीज वापरणाऱ्या घरगुती ग्राहकांना मिळणाऱ्या सवलतीमुळे ग्राहकांच्या वीजबिलाचा भार कमी होण्यास मदत होत आहे.
महाराष्ट्र वीज नियामक आयोगाच्या निर्देशानुसार सौर ऊर्जेच्या वापराला प्रोत्साहन देण्यासाठी ही योजना राबविण्यात येत आहे. दिवसा सौर ऊर्जेची उपलब्धता अधिक असल्याने या कालावधीत वीज वापरणाऱ्या ग्राहकांना त्याचा आर्थिक लाभ मिळावा, हा योजनेमागील प्रमुख उद्देश आहे. त्यानुसार चालू आर्थिक वर्षात सकाळी ९ ते सायंकाळी ५ या वेळेत वीज वापरणाऱ्या घरगुती ग्राहकांना प्रतियुनिट ८५ पैशांची सवलत दिली जात आहे.
चंद्रपूर जिल्हा बचतीत आघाडीवर
सप्टेंबर महिन्यात चंद्रपूर जिल्ह्यातील १ लाख ३६ हजार ३७ ग्राहकांनी एकूण २७ लाख ६९ हजार रुपयांची बचत केली. तर गडचिरोली जिल्ह्यातील १ लाख ६२ हजार ९१८ ग्राहकांनी २० लाख ९६ हजार रुपयांची बचत केली. दोन्ही जिल्ह्यांतील ग्राहकांना मिळून ४८.६५ लाख रुपयांचा आर्थिक लाभ झाला आहे.
मोबाईलवर वीज वापराची माहिती
स्मार्ट मीटरमुळे ग्राहकांना वीज वापरावर लक्ष ठेवणे अधिक सोपे झाले आहे. ‘एमसीएल महा ऊर्जा’ ॲपच्या माध्यमातून वीज वापराची माहिती पाहता येते. दर तासाला किंवा दिवसाला किती वीज वापरली, याचा तपशील उपलब्ध होत असल्याने ग्राहकांना आपल्या गरजेनुसार वीज वापराचे नियोजन करता येते.
मीटर रीडिंगची प्रक्रिया स्वयंचलित झाल्यामुळे मानवी चुकांची शक्यता कमी होण्यास मदत होत आहे. तसेच प्रत्यक्ष वीज वापराची माहिती उपलब्ध झाल्याने बिलिंगमधील विसंगती दूर करण्याच्या दृष्टीनेही ही यंत्रणा उपयुक्त ठरत आहे.
डिजिटल वीज व्यवस्थापनाला चालना
वीज वितरण व्यवस्थेचे आधुनिकीकरण, अचूक बिलिंग, तक्रारींचे जलद निराकरण आणि सौर ऊर्जेच्या वापराला प्रोत्साहन या उद्दिष्टांसाठी स्मार्ट मीटर महत्त्वाची भूमिका बजावत आहेत. आधुनिक तंत्रज्ञानाच्या मदतीने ग्राहकांना वीज वापराची माहिती पारदर्शकपणे उपलब्ध करून देण्यावर महावितरणचा भर आहे.
चंद्रपूर आणि गडचिरोली जिल्ह्यांतील ग्राहकांना मिळालेला आर्थिक लाभ पाहता, दिवसा वीज वापरण्याची सवय आणि स्मार्ट मीटरचा प्रभावी वापर ग्राहकांसाठी फायदेशीर ठरू शकतो. भविष्यात या आधुनिक व्यवस्थेचा अधिकाधिक ग्राहकांना लाभ मिळाल्यास वीज वापराचे नियोजन आणि ऊर्जा बचतीला आणखी चालना मिळण्याची अपेक्षा आहे.
