महिला खून प्रकरणाचा २४ तासांत उलगडा

धोपटाळा येथील महिला खून प्रकरणाचा २४ तासांत उलगडा
एलसीबी व राजुरा पोलिसांची संयुक्त धडक कारवाई; तेलंगणातून आरोपीला बेड्या

चंद्रपूर :- राजुरा तालुक्यातील धोपटाळा कॉलनी येथे घडलेल्या महिला खून प्रकरणाचा स्थानिक गुन्हे शाखा (एलसीबी) चंद्रपूर आणि राजुरा पोलिसांच्या संयुक्त पथकाने अवघ्या २४ तासांत उलगडा करून आरोपीला तेलंगणातून अटक केली आहे. या कारवाईमुळे जिल्हा पोलिस दलाच्या तपास कौशल्याचे पुन्हा एकदा दर्शन घडले आहे.

प्राप्त माहितीनुसार, फिर्यादी रणधीर राजू कुंभारे (वय ३७ वर्षे, रा. महाकाली कॉलनी, कापील चौक, चंद्रपूर) यांनी २९ मे २०२६ रोजी पोलिस स्टेशन राजुरा येथे तक्रार दाखल केली. त्यांच्या तक्रारीनुसार, त्यांची पत्नी शीतल कुंभारे या धोपटाळा येथील माहेरी असताना सकाळी सुमारे १०.३० वाजता संशयास्पद परिस्थितीत मृतावस्थेत आढळून आल्या.

फिर्यादी यांना त्यांच्या सासऱ्यांनी फोनवरून माहिती दिली की शीतल कुंभारे या रक्ताच्या थारोळ्यात पडलेल्या असून कोणतीही हालचाल करत नव्हत्या. त्यानंतर फिर्यादी तातडीने धोपटाळा येथे पोहोचले असता घराच्या मागील बाजूच्या खोलीत खाटेवर शीतल कुंभारे यांचा मृतदेह आढळला. अज्ञात व्यक्तीने धारदार शस्त्राने गळा चिरून त्यांचा खून केल्याचे प्राथमिक तपासात निष्पन्न झाले.
या प्रकरणी राजुरा पोलिस स्टेशनमध्ये गुन्हा क्रमांक ५२६/२०२६ अंतर्गत भारतीय न्याय संहिता (BNS) कलम १०३(१) व ३३२(२) अन्वये गुन्हा दाखल करण्यात आला.

घटनेचे गांभीर्य लक्षात घेऊन पोलीस अधीक्षक आयुष नोपाणी यांनी तातडीने तपासाच्या सूचना दिल्या. त्यांच्या मार्गदर्शनाखाली स्थानिक गुन्हे शाखेचे पोलीस निरीक्षक अमोल काचोरे आणि राजुरा पोलिस स्टेशनचे पोलीस निरीक्षक आसिफ राजा रोेख यांच्या नेतृत्वात विशेष पथके तयार करण्यात आली.

तांत्रिक तपास, गोपनीय माहिती आणि सायबर सेलच्या मदतीने तपासाची चक्रे वेगाने फिरविण्यात आली. तपासादरम्यान मिळालेल्या खात्रीशीर माहितीनुसार एलसीबीचे पोलीस उपनिरीक्षक विनोद भुरले व त्यांच्या पथकाने तेलंगणा राज्यातील मंचेरियाल जिल्ह्यातील रेपनपल्ली येथे धाड टाकून संशयित आरोपी राजेश व्यंकटी अड्टेला (वय ३५ वर्षे, रा. रेपनपल्ली, ता. चेनूर, जि. मंचेरियाल, तेलंगणा) याला ताब्यात घेतले.
पोलिसांनी केलेल्या चौकशीत आरोपीने गुन्ह्याची कबुली दिली. त्यानंतर पुढील तपास व कायदेशीर कारवाईसाठी आरोपीला राजुरा पोलिसांच्या ताब्यात देण्यात आले आहे.

सदर कारवाई पोलीस अधीक्षक आयुष नोपाणी, अपर पोलीस अधीक्षक ईश्वर कातकडे, यांच्या मार्गदर्शनाखाली उपविभागीय पोलीस अधिकारी सुधीर नंदनवार, स्थानिक गुन्हे शाखा (LCB), चंद्रपूर पो.नि. अमोल काचोरे यांच्या नेतृत्वात पोउपनि. विनोद भुरले, पोउपनि. सर्वेश बेलसरे, पोउपनि. सुनील गौरकर, पोहवा सुभाष गोहेकार, किशोर वैरागडे, अजय बागरेस, सतिश अवथे, इम्रान खान, संतोष येलुलवार, गणेश मोहोडे, पोअं/हिरालाल गुप्ता, शेखर माघनकर, गोपीनाथ नरोटे, इशांक बादामवार, किशोर वाकोटे, चापोअं वृषभ बारसिंगो, चापोअं/गजानन मडावी तसेच पोलीस स्टेशन, राजुरा चे
पो.नि. आसिफ राजा रोेख, सपोनि. लक्ष्मण लोकेरे, पोउपनि. दीपक ठाकरे, पोउपनि. पराग उल्लेवार, पोउपनि. अतुल राठोड, सफो किशोर तुमराम, पोहवाअनुप डांगे, विक्की निवाण, पोअं शाफिक रोेख, मिलिंद जांभुळे, महेश बोडोलवार, राजू दुबे तसेच सायबर सेल, चंद्रपूर येथील
पोहवा कार्तिक खनके, पो.अ. गुणवंत आणि अनिमेष यांनी पार पाडली.